گهیځ
ګهیځ نیوز: نن یکشنبه (د غبرګولي یا جوزا ۱۵مه او د جون میاشتې ۵مه نېټه ده) د ا.ا امارت وايي، په افغانستان کې د ټولو اقلیتونو مذهبي او مدني حقونه خوندي دي.
د افغان حکومت مرکزي ویاند ذبیح الله مجاهد پر خپل ټویټر لیکلي، چې د امریکا د بهرنیو چارو وزارت وروستی راپور نیمګړی او د ناسمو معلوماتو پر بنسټ ولاړ دی.
د ده په وینا افغانستان کې د ټولو مذهبونو لارویان په ازاد ډول خپل مذهبي مراسم ترسره کولی شي: ” زموږ ټول اهل سنة، اهل تشیع، سیکهـ او اهل هنود هېوادوال په ازاد ډول خپلې مذهبي چارې ترسره کوي”.
افغان حکومت د امریکا د بهرنیو چارو وزارت راپور ته په خطاب کې ویلي، تمه لري چې له دې وروسته به خپل راپورونه واقعیتونو ته په کتو جوړ کړي.
امریکا افغانستان د هغو هېوادونو په کتار کې راوستی و، چې مذهبي ازادي پکې له خنډ او ګواښ سره مخ ده، هغه څه چې افغان حکومت رد کړی دی.
