گهیځ
ګهیځ نیوز: نن چهارشنبه (د چنګاښ یا سرطان ۲۲مه او د جولای میاشتې ۱۳مه نېټه ده) د ازبکستان د بهرنیو چارو وزارت وايي، د افغانستان په اړه د نړیوالې ناستې د دایرولو لپاره چمتووالی نیسي.
د ازبکستان د بهرنیو چارو وزارت لخوا په خپره شوې رسمي ویبپاڼه کې لیکل شوي، چې تاشکند په دوو اوونیو کې د څه باندې ۲۰ هېوادونو او نړیوالو موسسو استازي جرګه کوي چې په افغانستان کې د روان حالت په اړه خبرې وکړي.
د افغانستان د ا.ا حکومت هم تایید کړې، چې د بهرنیو چارو وزیر به یې په دې ناسته کې ګډون وکړي.
د اطلاعاتو او کلتور وزارت مرستیال ذبیح الله مجاهد تېره شپه په دې اړه ویلي: “تېره میاشت د ازبکستان د ملي امنیت سلاکار عبدالعزیز کاملوف په کابل کې د ا.ا حکومت د ريیس الوزراء له مرستیال ملاعبدالغني ملابرادر سره په کتنه کې د دې غونډې په اړه خبرې کړې وې.”
د دې غونډې د اجنډا په اړه ډېر څه نه دي ویل شوي او دا هم لا څرګنده نه ده چې کوم هېوادونه به دې ناسته کې ګډون کوي.
