گهیځ
ګهیځ: نن چهارشنبه (د کب ۲۵مه او د مارچ ۱۶مه نېټه ده) د حکومت له خوا په خپره شوې خبرپاڼه کې ویل شوي، چې دغه کمیسیون د (د راستنیدو او اړیکو کمیسیون) تر عنوان لاندې جوړ شوی او مشري یې د کانونو او پټرولیم وزارت سرپرست مولوي شهاب الدین دلاور کوي.
په دې خبرپاڼه کې د دغه کمیسیون د فعالیتونو په اړه جزئیات نه دي ورکړل شوي.
د اسلامي امارت تر واکمنۍ راهیسې د پخواني حکومت ډېری چارواکي له افغانستانه تښتېدلي دي. د اسلامي امارت چارواکو په وار وار پر پخوانیو چارواکو غږ کړی چې هېواد ته دې راستانه شي.
د دولت کابینې هم د خپلو امنیتي ځواکونو پر موټرو د اسلامي امارت د مشرانو د عکسونو پر لګولو «بشپړ» بندیز لګولی دی.
په دې اړه په خپره شوې خبرپاڼه کې ویل شوي، چې د کورنیو چارو، دفاع او استخباراتو وزارتونو ته دنده سپارل شوې چې تر خپل واک لاندې ځواکونه له دې کار منع کړي.
