گهیځ
ګهیځ نیوز: نن چهارشنبه (د وري ۱۷مه او د اپرېل ۶مه نېټه ده) ملګري ملتونه وایي افغانستان کې اوسنۍ بشر پاله مرستې بسنه نه کوي.
په افغانستان کې د دغې ادارې د پراختیايي پروګرام مشر عبدالله الدردادي ویلي، چې دلته د خلکو د ژغورنې لپاره د دوی پر هوساینه لا ډېر کار ته اړتیا ده.
د نوموړي په وینا تر هغه چې نړیواله ټولنه د افغانانو د ژغورنې او اقتصادي ودې لپاره یو پیاوړی او پراخ پروګرام پیل نه کړي اوسنۍ مرستې به پایله و نه لري او بسنه هم نه کوي.
عبدالله وایي که نړیواله ټولنه په رښتیا غواړي چې په افغانستان کې بشري ننګونې کمې کړي نو د افغانانو د ژوند په ښه کولو کې باید رغنده رول ترسره کړي.
ملګرو ملتونو تر دې وړاندې هم ویلي و چې په افغانستان کې روان بشري وضعیت بوږنوونکی دی، راټولې شوې مرستې بسنه نه کوي او لا ډېرو مرستو ته اړتیا لیدل کېږي.
