گهیځ
ګهیځ نیوز: نن سې شنبه (د زمري/اسد ۱۸مه د اګسټ ۹ نېټه ده) د کورنيو چارو سرپرست وزير سراج الدين حقاني وایي، د بنسټيزو پروژو ساتنه او پالنه افغانستان د ځان بسياينې په لور بيايي.
د کورنیو چارو وزارت لخوا په یوه خپره شوې خبرپاڼه کې راغلي چې خلیفه حقاني دا څرګندونې هلمند ولایت ته د سفر په ترڅ کې له کجکي برېښنا بند څخه د ليدنې پر مهال کړې ده.
خبرپاڼې زیاته کړې، چې سرپرست وزیر د دې لیدنې پرمهال امنيتي مسوولينو ته جدي سپارښتنه وکړه، چې په ټول توان د دې بنسټیزې پروژې ساتنه وکړي.
په خبرپاڼه کې راغلي، نوموړي د کجکي بند له تخنيکي مسوولينو او انجنيرانو سره هم وليدل، د هغوى د زیار او هڅو ستاينه يې وکړه او وې وهڅول چې د داسې ټولګټو پروژو په کار کې تر وروستي حده زيار وباسي.
نوموړي په ټينګار سره وويل چې د داسې بنسټيزو پروژو رغول او ساتل د افغانستان ا.ا له لومړيتوبونو څخه دي او باور لري چې پر خپلو پښو درېدلو لپاره ترټولو غوره لار همدا ده.