گهیځ
د ننګرهار ولایت چارواکي وايي د ملګرو ملتونو د خوړو او کرنې ادارې «FAO» په مرسته پر ۱۱ زره بزګرانو اصلاح شوي تخمونه ووېشل شول.
د ننګرهار مطبوعاتي دفتر نن یکشنبه (د لیندۍ ۷مه) په یوه خبرپاڼه کې ویلي پر دغو بزګرانو ۵۵۰ مټریک ټنه اصلاح شوي تخمونه وېشل شوي دي.
تر دې مخکې د ملګرو ملتونو د خوړو او کرنې ادارې د بزګرانو او مالدارانو د کروندو او معیشت پر ژغورل کېدو ټینګار کړی و.
دغې ادارې ویلي وو چې وچکالیو دغه دواړه سکټورونه اغېزمن کړي دي.
تر دې وړاندې د کندز ولایت په چاردرې ولسوالۍ کې له دست بدست موسسې لخوا بزګرانو باندې د غنمو اصلاح شوي تخمونه وېشل شوي و، چې هر بزګر ته یې ۵۰ کیلو ګرامه غنم ورکول.